காப்பியும் பேஸ்ட்டும் கண்ணெனத் தகும்

பீடிகை.01: இந்த இடுகையில் உள்குத்து, வெளிக்குத்து, இடக்குத்து, வலக்குத்து, நடுக்குத்து, மேல்குத்து, கீழ்க்குத்து, முன்குத்து, பின்குத்து எதுவும் இல்லை என்று செத்துப்போன என் கொள்ளுத்தாத்தாவின் எள்ளுப்பாட்டியின் மீது சத்தியம் செய்கிறேன்.

பீடிகை.02: பீடிகை எனப்படுவதை செந்தமிழில் "முஸ்கி" என்பர். எனவே, அதை 'பீடி'யைக் கையில் வைத்துக்கொண்டு எழுதியது எனப் பொருள்கொள்ளுதல் தவிர்க்க!

கொஞ்ச நாட்களாகவே, வலையுலகத்தில் காப்பி-பேஸ்ட் பதிவர்களைக் குறித்த நக்கல் நையாண்டிகளும், காரசாரமான இடுகைகளும் அவ்வப்போது காணக்கிடைக்கின்றன.

அந்தோ! சற்றும் சுயமுனைப்பின்றி, பிறரது உழைப்பினை இலகுவாய் ஒற்றியெடுத்து ஒட்டி ஒப்பேற்றிக்கொண்டிருக்கும் உன்மத்தர்காள்! உம்மால் வலையுலகம் பொலிவற்று, நலிவுற்று, கிலியுற்றுக் கிடக்கும் இழிநிலையை எங்ஙனம் விளக்குவது? ஐயகோ! - என்றெல்லாம் விசனத்தில் புருவங்சுருக்கி, பொங்கியெழுந்து ஆங்காங்கே பலரது கண்டனக்குரல்கள் ஓங்கி ஒலித்துக்கொண்டிருக்கின்றன. (சேட்டை, உனக்கும் தமிழ் வருதுடா ராசா!)

சரி, கொஞ்சம் கியரை மாத்திக்கிறேன்!

காப்பி-பேஸ்ட் என்னும் அருங்கலையை ஏதோ தமிழ் வலைப்பதிவர்கள் தான் தவமிருந்து வரமாய்ப் பெற்றது போல ஒரு மாயை உருவாகி விட்டது. உண்மையில் இந்த காப்பி-பேஸ்ட் என்பது ’தொட்டுத்தொடரும் ஒரு ஒட்டுப் பாரம்பரியம்."

சினிமாவையே எடுத்துக் கொள்ளுவோம்! எந்த ஒரு சினிமா வந்தாலும் ’இது அந்தப் படத்தைப் பார்த்து ஈயடிச்சான் காப்பியடிச்சிருக்காங்க," என்று திரைவிமர்சகர்கள் எழுதுவதில்லையா? (ஹலோ, அதுக்குள்ளே கமல்ஹாசன் ரசிகர் ஒருத்தரு மைனஸ் ஓட்டுப் போடக் கிளம்புறாரு பாருங்க! முழுசாப் படிங்கண்ணே! ஓட்டு எங்கே போயிரும்?)

உலகமே வியந்து போற்றிய இந்திய இயக்குனர் மறைந்த சத்யத்ஜித் ரே-க்கு மிகவும் பிடித்தமான திரைப்படம், "ஷோலே" இந்திப்படம் தானாம். ஆனால், அந்த ’ஷோலே" படமே அகிரா குரோசாவாவின் "செவன் சாமுராய்’, ஜான் ஸ்டர்ஜஸின் "தி மேக்னிஃபிஷியன்ட் செவன்", சாம் பெக்கின்பாவின் "தி வைல்ட் பன்ச்", ஜார்ஜ் ராய் ஹில்லின் "பட்ச் கேஸிடி அண்ட் தி சண்டன்ஸ் கிட்" போன்ற பல ஹாலிவுட் படங்களிலிருந்து ஆங்காங்கே காப்பி பேஸ்ட் செய்யப்பட்டது தானாம். (இதெல்லாம் உனக்கு எப்படித் தெரியும் சேட்டை-னு கேட்கறீங்களா? எல்லாம் காப்பி-பேஸ்ட் கைங்கரியம் தான்!)

சமீபத்துலே வெளியாகி சக்கைபோடு போட்டுக்கொண்டிருக்கிற "தெய்வத்திருமகள்," படம் கூட ஏதோ "I am Jam," மன்னிக்கவும் "I am Sam," என்ற படத்தைத் தழுவி எடுக்கப்பட்டதாம்.

சினிமாவை விடுவோம்! ஹார்வர்ட் பல்கலைக்கழகத்துக்குப் படிக்கப் போன நம்மூரு மாணவி காவ்யா விஸ்வநாதன் என்ற இளம்பெண் எழுதிய "How Opal Mehta got kissed, got wild, and got a life" என்ற புத்தகம் ஒரு ஈயடிச்சான் காப்பி என்று கண்டுபிடித்து, அதுக்கப்புறம் அவங்களை எல்லாரும் "How Kaavya Viswanathan got rich, got caught, and got ruined" என்று கலாய்க்க ஆரம்பிச்சிட்டாங்களாம்.

சரி, சினிமாக்காரங்களும், எழுத்தாளர்களும் தான் இப்படீன்னா, பத்திரிகையாளர்கள் எப்படி இருக்காங்கன்னு பார்க்கலாமா?

கி.பி.1999-ல் "ஹிந்துஸ்தான் டைம்ஸ்" பத்திரிகையில் வி.என்.நாராயணன் என்பவர் “For ever in Transit” என்ற தலைப்பில் ஒரு கட்டுரை எழுதியிருந்தார். அவர் எங்கே எழுதினாரு? அப்படியே "ஸண்டே டைம்ஸ்" பத்திரிகையில் பிரையன் ஆப்பிள்யார்ட் என்பவரின் கட்டுரையை ஹைஜாக் பண்ணி இங்கிட்டுப் போட்டுட்டாரு! விஷயம் வெளியே தெரிஞ்சதும் மூச்சுக்காட்டாம ராஜினாமா பண்ணிட்டாராம்!

"இந்தியா டுடே" பத்திரிகையைப் பத்தி தெரியாதவங்க யாரும் இருக்க முடியாது. அரூண் பூரி தான் அதன் ஸ்தாபகர் மற்றும் முக்கிய ஆசிரியர். அவர் 2010, அக்டோபர் 18 அன்று "எந்திரன்" படத்தைப் பற்றியும், ரஜினிகாந்தைப் பற்றியும் ஒரு கட்டுரை எழுதினாரு! அது இன்னாடான்னா, "ஸ்லேட்" என்ற பத்திரிகையில் க்ரேடி ஹெண்ட்ரிக்ஸ் என்பவர் எழுதின கட்டுரையிலிருந்து காப்பி பேஸ்ட் பண்ணினதுன்னு குற்றச்சாட்டு எழுந்தது. "பொய்! பொய்! நான் ஜெட்-லாகில் இருந்தபோது என்னோட கட்டுரையை காக்காய் தூக்கிட்டுப் போயிருச்சு!" என்று அவர் சொன்னாலும், எல்லாரும் அதை அன்-நம்பபிள்-னு மறுத்திட்டாங்க!

சரி, தொலைக்காட்சிகளாவது தேவலாமா என்று பார்த்தால், அது இன்னும் கொடுமை!

NDTV has exclusive details -னு ஸ்க்ரோல் போடுறாங்க. அப்புறம் அம்மணி பர்கா தத் "BUCK STOPS HERE!" நிகழ்ச்சியிலே ஜோதிகாவை விட அட்டகாசமா எக்ஸ்பிரஷனோட யாரையாவது கேள்விகேட்டு மாட்டு மாட்டுன்னு மாட்டுறாங்க!

CNN-IBN SPECIAL! கொஞ்சம் முன்னாடி என்.டி.டிவியிலே போட்ட அதே ஸ்க்ரோலை வித்தியாசமாக் காட்டுறாங்க! அப்பாலே அம்மணி சாகரிகா கோஷ் இல்லாட்டி அண்ணன் ராஜ்தீப் சர்தேசாய் வந்து மூணாம் கிளாஸ் படிக்கிற புள்ளைங்களாட்டம் கையிலே ஒரு பென்சிலை வச்சுக்கிட்டு ஆட்டி ஆட்டிக் கேள்வி கேட்குறாங்க!

இவங்க கிட்டேயிருந்து தப்பிச்சாலும், TIMES NOW தம்பி அர்னாப் கோஸ்வாமி கிட்டேயிருந்து தப்பிக்கவே முடியாது. இவரு கேள்வி கேட்குற இஷ்டைலு இருக்குதே, "என்ன கையைப் புடிச்சு இழுத்தியா...?’ என்ற வடிவேலுவின் காமெடி கெட்டது போங்கள்!

பெரியோர்களே! தாய்மார்களே!!

இந்த மூணு பேருமே ஒரே பேப்பரைக் கையிலே வைச்சுக்கிட்டு, "என் கிட்டே தான் இருக்கு; நான் தான் கண்டுபிடிச்சேன்," என்று மார்தட்டிக்கிற பெருமையைப் பார்த்த பிறகுமா, காப்பி-பேஸ்ட் பண்ணுறது தப்புன்னு சொல்றீங்க?

அந்தோ, வேதனையில் என் இதயம் வெடித்துப் புஸ்வாணமாகி விடும் போலிருக்கிறதே!

அது தப்புன்னா, அந்தத் தப்பை நம்ம சேட்டை டிவியும் செய்யப்போகுது! இதோ உங்களுக்காக, இந்தியாவின் மாபெரும் ஊழல் குறித்த சி.ஏ.ஜி.அறிக்கைகள்!

SETTAI TV EXCLUSIVE! கீழே சொடுக்குங்க எசமான் சொடுக்குங்க!

ஆதர்ஷ் ஊழல்! திடுக்கிடும் தகவல்கள்

காமன்வெல்த் விளையாட்டு ஊழல்

பார்த்தீங்களா? பல்பு வாங்கினீங்களா? சி.ஏ.ஜியின் இணையதளத்திலிருக்கிற அறிக்கையை சேட்டை டிவி Exclusive-னு சொல்லி ஏமாத்திருச்சே-ன்னு கோபம் வருதா?

இதைத்தான் எல்லா டிவிகளும் தொடர்ந்து செஞ்சுட்டிருக்காங்க! அதாவது தினம் அவங்க கிட்டே பல்பு வாங்கிட்டிருக்கோம்!

இப்படி இவங்க காப்பி-பேஸ்ட் பண்ணி கொள்ளை கொள்ளையாக் காசு சம்பாதிக்கிறாங்களே, முதல்லே அவங்களைக் குத்தம் சொல்லுங்க!

அதை விட்டுப்புட்டு, எந்த ஆதாயத்துக்காகவும் இல்லாம, பொழுதுபோக்குக்காகவோ, மற்றவர்கள் தெரிஞ்சுக்கிடட்டுமே என்ற நல்லெண்ணம் காரணமாகவோ காப்பி-பேஸ்ட் பண்ணுற பதிவர்களை மட்டும் குற்றம் சொல்லுறது நியாமில்லேன்னு படுதுங்க! அப்புறம் உங்க இஷ்டம்!

"நன்றி"-ன்னு போட்டு எழுதற வரைக்கும், காப்பிரைட் சட்டத்தை மீறாதவரைக்கும் தப்பில்லை! இல்லவே இல்லை!

நான் காப்பி-பேஸ்ட் பண்ணுறதில்லை. காரணம் ரொம்ப சிம்பிள்!

மற்ற பதிவர்கள் திருக்குறளை காப்பி-பேஸ்ட் பண்ணினா எப்படிப் போடுவாங்க?

அகர முதல எழுத்தெல்லாம் ஆதிபகவன் முதற்றே உலகு
நன்றி: திருவள்ளுவர்.

அதையே நான் போட்டா...

அகர முதல எழுத்தெல்லாம் ஆதிபகவன் முதற்றே உலகு
நன்றி: தமிழ் வாத்தியார் அடைக்கோழி!

Tweet