உடல்நல விழிப்புணர்ச்சிக்கு வித்திட்ட டாஸ்மாக்

சென்னையிலிருந்து நமது சிறப்பு நிருபர்: மந்தாரம்புதூர் மப்பண்ணன்.

சென்னை அண்ணா சாலையில் புதிதாக எழும்பியுள்ள அடுக்கு மாடிக்கட்டிடத்தை பார்க்காதவர்கள் யாரும் இருக்க முடியாது. உலகிலேயே மிகப்பெரிய கட்சிக்கட்டிடத்தை எழுப்பிய பெருமிதம் குடிமக்கள் முன்னேற்றக் கழகத்தின் பொதுச்செயலாளர் கிங்ஃபிஷர் கிருஷ்ணசாமியின் முகத்தில், பொட்டென்று திறந்த பீர்பாட்டிலைப் போலப் பொங்கி வழிந்து கொண்டிருந்தது.

"மற்ற கட்சிகளைப் போல நாங்கள் தொண்டர்களிடமிருந்து நிதிவசூலித்து இந்தக் கட்டிடத்தை எழுப்பவில்லை," என்று உணர்ச்சிபொங்கக் கூறிய கிருஷ்ணசாமி, "எமது கட்சித்தொண்டர்கள் தமிழகம் முழுவதும் ஒவ்வொரு டாஸ்மாக் கடை வாசலிலும் கால்கடுக்கக் காத்திருந்து சேகரித்த காலிபாட்டில்களைக் காயலான்கடையில் விற்ற பணத்தில்தான் ஒரே ஆண்டில் இப்படியொரு கட்டிடத்தைக் கட்ட முடிந்தது." என்று குறிப்பிட்டபோது, கு.மு.க தொண்டர்கள் குதூகலத்தோடு "சியர்ஸ்! சியர்ஸ்!!" என்று கூக்குரல் எழுப்பினர். இருக்காதா பின்னே? சென்ற 2009-10 நிதியாண்டில் காலி பாட்டில்களை விற்ற கணக்கில் மட்டும் அரசுக்கே ரூ.500 கோடி வருவாய் கிடைத்ததாமே?

இதைத் தொடர்ந்து நமது கேள்விகளுக்கு, கிங்ஃபிஷர் கிருஷ்ணசாமி அளித்த பதில்கள் பின்வருமாறு:

கேள்வி: இந்த ஆண்டு டாஸ்மாக் மது விற்பனை மூலம் ரூ.14,965 கோடி வருமானம் தமிழக அரசுக்குக் கிடைத்திருப்பதாக, சட்டசபையில் விளக்கக் குறிப்பு தாக்கல் செய்யப்பட்டுள்ளதே? இது குறித்து உங்களது கருத்தென்ன?

பதில்: மிகவும் பெருமையாக இருக்கிறது. ஒவ்வொரு ரவுண்டிலும் மப்பு அதிகரிப்பது போல ஒவ்வொரு ஆண்டும் அரசுக்கு வருமானமும் அதிகரித்து வருவது எங்கள் கட்சித்தொண்டர்களுக்கு மாநிலத்தின் மீதுள்ள அக்கறையைப் பறைசாற்றுகிறது. 1995-96-ம் ஆண்டில் இந்த வருவாய் வெறும் ரூ. 1,425 கோடியாக இருந்ததைக் கவனித்தாலே, இந்த ஐந்தாண்டுகளில் எங்களது கட்சியின் வளர்ச்சியை அனைவராலும் புரிந்து கொள்ள முடியும்.

கேள்வி: அரசு தாக்கல் செய்த அறிக்கையில் ஏதேனும் குறிப்பிடத்தக்க தகவல்கள் இருக்கின்றனவா?

பதில்: தொடர்ந்து பீர்வகைகளின் விற்பனை இரண்டாவது இடத்திலேயே இருப்பது கவலை தருவதாக உள்ளது. மதுவகைகள் கடந்த நிதியாண்டில் 480.46 லட்சம் பெட்டிகள் விற்பனையாகியிருக்கும்போது, பீர் வகைகள் வெறும் 270.88 லட்சம் பெட்டிகள் மட்டுமே விற்பனையாகியிருப்பது, இன்னும் எங்களது கட்சிக் கொள்கைகள் தமிழகத்தை முழுமையாகச் சென்றடையவில்லையோ என்ற சந்தேகத்தை ஏற்படுத்தியிருக்கிறது. ஆகவே, எங்கள் கட்சியின் கொள்கைப் பரப்புச் செயலாளர் "சாண்ட்பைப்பர்" சபாபதியின் தலைமையில் "பீரின்றி அமையாது உலகு," என்ற கோஷத்தை முன்னிறுத்தி ஒரு விழிப்புணர்வுப் பிரச்சாரம் மேற்கொள்ளப்படும். பொதுமக்களும் குடிமக்களும் இந்தப் போராட்டத்துக்கு பீராதரவு தருமாறு கேட்டுக்கொள்கிறோம்.

கேள்வி: இப்படியொரு விழிப்புணர்ச்சி தேவைதானா?

பதில்: என்ன அப்படிக் கேட்டு விட்டீர்கள்? சமீபத்தில் டைம்ஸ் ஆஃப் இந்தியாவில் கூட ’தினமும் பீர் குடிப்பது உடல்நலத்துக்கு நல்லது,’ என்று ஒரு கட்டுரை எழுதியிருந்தார்களே? அதனால் தான் ’உடல் மண்ணுக்கு; குடல் பீருக்கு," என்பதை எங்கள் கட்சியின் கோஷமாகவே வைத்திருக்கிறோம்.

கேள்வி: இப்படியொரு விழிப்புணர்ச்சிப் பிரச்சாரத்தை மேற்கொண்டால், பிற மதுவகைகளின் விற்பனை பாதிக்கப்படாதா?

பதில்: அது எப்படி பாதிக்கும்? அதே டைம்ஸ் ஆஃப் இந்தியாவில் இன்னொன்றும் சொல்லியிருக்கிறார்களே? ’ஒரு நாளைக்கு இரண்டு ரவுண்டு மது அருந்துவதும் இருதயத்துக்கு மிகவும் நல்லது’ என்று?

கேள்வி: ஆனால், உங்கள் தொண்டர்கள் இரண்டு ரவுண்டோடு நிறுத்துவதில்லையே?

பதில்: அப்படியெல்லாம் அபாண்டமாகச் சொல்லக்கூடாது. எங்கள் தொண்டர்கள் ஒரே கடையில் இரண்டு ரவுண்டுக்கு மேல் அடிக்கக்கூடாது என்று சுற்றறிக்கை அனுப்பியிருக்கிறோம். இரண்டு ரவுண்டு போதவில்லையென்றால், அடுத்த கடைக்குப் போய் மேலும் இரண்டு ரவுண்டு அடிக்கலாம். அது கட்சியின் விதிமுறை மீறலாகக் கருதப்பட மாட்டாது.

இன்னும் சொல்லப்போனால், எங்களது கட்சி நிர்வாகிகளில் பலர் தினமும் இரண்டு ரவுண்டு விஸ்கியும், ஒரு பாட்டில் பீரும் குடித்து அவரவர் உடல்நலத்தைச் சிறப்பாகப் பேணி வருகிறார்கள் என்பதை மகிழ்ச்சியுடன் தெரிவித்துக் கொள்கிறேன்.

கேள்வி: அப்படியென்றால், அரசு வெளியிட்டுள்ள தகவல்கள் அனைத்தையும் நீங்கள் ஏற்றுக்கொள்கிறீர்களா?

பதில்: எப்படி ஏற்றுக்கொள்ள முடியும்? இந்த ஆண்டும் மொத்தம் எத்தனை வெள்ளரிக்காய், கொய்யாக்காய், மாங்காய் விற்பனையாகியது என்ற விபரத்தை அரசு தரவில்லை. அதே போல எத்தனை ஆம்லெட், எத்தனை ஆப்பாயில் என்ற கணக்கும் வெளியிடப்படவில்லை. குறைந்தபட்சம் எத்தனை டன் ஊறுகாய் விற்பனையாயிற்று, அதில் மாங்காய் ஊறுகாய் எவ்வளவு, எலுமிச்சை ஊறுகாய் எவ்வளவு என்பன போன்ற அத்தியாவசியத் தகவல்களையாவது அரசு வெளியிட வேண்டாமா?

கேள்வி: உங்களது கட்சி டாஸ்மாக் கடைகளுக்கு விடுமுறை வழங்குவதைத் தொடர்ந்து எதிர்த்து வருகிறது. ஆனால், இந்த ஆண்டுமுதல் எட்டு நாட்கள் விடுமுறையாமே?

பதில்: இது ஜனநாயக விரோதப்போக்கு! குடியரசு நாட்டிலே, குடியரசு தினத்தன்று குடிக்க முடியாது என்பது எதேச்சாதிகாரம் அல்லவா? இதைக் கண்டித்து எமது பொருளாளர் பகார்டி பக்கிரிசாமி காலவரையற்ற "ஜின்"னாவிரதம் இருக்கப்போகிறார். எமது கோரிக்கையை அரசு ஏற்கும்வரையில் அவர் ஜின் தவிர பிற சரக்குகளை மட்டுமே அருந்துவார்.

கேள்வி: உங்கள் கட்சி எந்த கட்சி ஆட்சிக்கு வந்தாலும் தொடர்ந்து எதிர்க்கிறதே? திடீரென்று தமிழகத்தில் முழு மதுவிலக்கை அமல்படுத்தி விடும் என்ற பயமில்லையா?

பதில்: டாஸ்மாக் கடைகள் விஷயத்தைப் பொறுத்தவரையில் அனைத்துக் கட்சிகளுமே எங்களது கொள்கையைத் தான் கடைபிடிக்கின்றன. நாங்கள் இல்லாவிட்டால் பொதுமக்களுக்கு இலவசங்கள் அளிக்க அரசுக்கு ஏது நிதி? ஆகையால், மதுவிலக்கு என்ற பேச்சுக்கே இடமில்லை.

கேள்வி: ஆனால், உங்களது கட்சியின் கோரிக்கைகள் தொடர்ந்து அரசால் நிராகரிக்கப்படுகின்றனவே?

பதில்: உண்மைதான்! ஒரு குவார்ட்டருக்கு ஒரு வாட்டர் பாக்கெட் இலவசமாகத் தருவதாக தேர்தலின்போது வாக்களித்ததை, அரசியல்வாதிகளின் பேச்சு விடிஞ்சால் போச்சு என்ற பழமொழிக்கேற்ப மறந்துவிட்டார்கள்.

கேள்வி: உங்களது கட்சியில் உங்களது குடும்பத்தாருக்கு அதிக முக்கியத்துவம் தருவதாகக் கூறி, முன்னாள் கொள்கைப் பரப்புச் செயலாளர் கோல்கொண்டா கோவிந்தசாமி போர்க்கொடி உயர்த்தியிருக்கிறாரே?

பதில்: இது அபாண்டமான குற்றச்சாட்டு! ஒரு முறை எனக்கு மப்பு கொஞ்சம் அதிகமாகியிருக்கவே, நள்ளிரவுக்கு மேல் என்னை கோவிந்தசாமி ஒரு மீன்பாடி வண்டியிலே வீட்டுக்குக் கொண்டு சேர்த்தார். கதவைத் திறந்த என் மனைவி, தூக்கக்கலக்கத்தில் எனக்குப் பதிலாக கோவிந்தசாமியை நையப்புடைத்து விட்டார். இதற்காக, என் கட்சியில் என் குடும்பத்தாரின் தலையீடு இருப்பதாகச் சொல்வதா?

கேள்வி: கடைசியாக, அரசு உடனடியாக கவனத்துக்கு எடுத்துக்கொள்ள வேண்டி ஏதேனும் கோரிக்கைகளை வைப்பீர்களா?

பதில்: நிச்சயம்! ’இந்தியா கிராமங்களில் வாழ்கிறது,’ என்று மகாத்மா காந்தி சொல்லியிருக்கிறார். ஆனால், அரசு வெளியிட்ட அறிக்கையின்படி, நகரங்களில்
3,562 டாஸ்மாக் கடைகள் இருக்கையில், கிராமப்புறங்களில் வெறும் 3,128 கடைகள் மட்டுமே இருப்பதாக அறிய முடிகிறது. படித்தவர்கள் பெரும்பாலும் வசிக்கும் நகரங்களில் இருப்பதை விடவும், ஏழை எளிய மக்கள் அதிகம் வசிக்கும் கிராமங்களில் இன்னும் பல கடைகளைத் திறந்தால், இனி வருகிற தேர்தல்களில் இலவச ஹ்யூண்டாய் கார்கள் அளிப்பதாகவும் வாக்குறுதியளிக்க முடியும். எனவே, மாநிலத்தின் பொருளாதாரத்தை மேம்படுத்த அரசு இதுகுறித்து தீவிரமாகப் பரிசீலிக்க வேண்டுமென்று கேட்டுக்கொள்ளுவோம்.

பேட்டியின் முடிவில், நிருபர்களுக்கு மார்கோ போலோ பீரும், காரசேவும் வழங்கப்பட்டது.